Tysdag 9. april vart det arrangert trafikksikringsdag for alle elevar på Fitjar vidaregåande skule og for 9. og 10. trinn på Rimbareid barne- og ungdomsskule.
Dagen opna med eit inspirerande føredrag frå psykolog og stipendiat Jan-Ove Hesselberg, kjend frå fleire populærvitskapeleg program på TV og frå podkastar. Han snakka om korleis me alle kan læra oss å ta betre avgjersler ved å bli meir medvitne for kva som styrer oss når me tek store og små avgjersler i kvardagen. Føredraget hans var tankevekkande, og han involverte publikum ved hjelp av spørsmål og avstemmingar på mobil.
![Føredragshaldar Jan-Ove Hesselberg står på ein talerstol og snakker til salen. I bakgrunnen står det skrive "bedre beslutninger."](/contentassets/0f1d07717f9548bc84cf094fc05fabeb/trafikksikringsdagen-8.jpg?width=1280&quality=80)
Deretter vart alle deltakarane samla utanfor parkeringsplassen på Fitjar vgs for dagens brutale høgdepunkt: Bildroppet. Her vart ein bil sleppt frå ei mobilkran i ein fart tilsvarande 80 km/t, slik at alle tilskodarane tydeleg fekk demonstrert kva som skjer dersom ein kolliderer i denne farta. Etterpå kom naudetatane til skadestaden. Fitjar brann- og redning demonstrerte kva dei gjer når dei kjem først til ein ulukkesstad. Ei dokke vart redda ut av den samanpressa bilen og køyrd vekk i ambulanse. Politiet fortalte og om kva som er deira rolle på ulukkesstaden. Heile seansen gjorde sterkt intrykk på både vaksne og ungdommar!
![Ein bil er heist opp i toppen av en krane, klar til å sleppast](/contentassets/0f1d07717f9548bc84cf094fc05fabeb/trafikksikringsdagen-2.jpg?width=1280&quality=80)
![Me ser ein bil i det den kræsjer i bakken og fronten blir trykka inn](/contentassets/0f1d07717f9548bc84cf094fc05fabeb/trafikksikringsdagen-9.jpg?width=1280&quality=80)
![Ein mann frå Fitjar brann og redning som bruker ei stor metallsaks for å klippa open i dør i bilvraket](/contentassets/0f1d07717f9548bc84cf094fc05fabeb/trafikksikringsdagen-3.jpg?width=1280&quality=80)
![Ei dokke på ei båre blir frakta frå bilvraket og inn i ein ambulanse](/contentassets/0f1d07717f9548bc84cf094fc05fabeb/trafikksikringsdagen-4.jpg?width=1280&quality=80)
Etterpå rullerte elevane på ulike postar utanfor og inni kulturhuset, bemanna av representantar frå NAF, ambulansetenesta i Helse Fonna, Politiet og Sunnhordland trafikkopplæring. NAF hadde teke med bråstoppmaskinen og «Velte-Jacob», der elevane sjølv kunne få kjenna fysikken sine lovar på kroppen.
![Ein lærar er på veg inn ein velte-jacob, ein maskin som snurrer ein bil opp ned](/contentassets/0f1d07717f9548bc84cf094fc05fabeb/trafikksikringsdagen-5.jpg?width=1280&quality=80)
![To elever i bråstoppmaskinen, som bråstopper slik at håret flagrar](/contentassets/0f1d07717f9548bc84cf094fc05fabeb/trafikksikringsdagen-6.jpg?width=1280&quality=80)
Trafikksikringsdagen i Fitjar kommune vert arrangert annakvart år, og er eit samarbeid mellom Fitjar kommune, Rimbareid barne og ungdomsskule og Fitjar vidaregåande, koordinert av Fitjar frivilligheitssentral. Arrangementet er støtta av fylkestrafikksikringsutvalet (FTU) i Vestland fylkeskommune.
![Vraket av bilen som var knust under trafikkdagen, nærbilete](/contentassets/0f1d07717f9548bc84cf094fc05fabeb/trafikksikringsdagen-7.jpg?width=1280&quality=80)