Torsdag 19. september deltok to klassar frå Fitjar vgs på strandryddings-dugnad på Skumsnes i Fitjar.
Rein Hardangergjord er namnet på ein rydde-dugnad som vart arrangert torsdag 19. september 2024 i kommunane Austevoll, Bømlo, Eidfjord, Etne, Fitjar, Kvam, Kvinnherad, Stord, Sveio, Tysnes, Ullensvang, Ulvik og Voss. Alle som ønska å delta kunne melda seg som rydde- eller transportmannskap, og kommunane stilte med containerar, hanskar og sekkar. Ryddeområdet kunne ein velja sjølv, og målet var å rydda så mykje marin forsøpling som ein klarte på ein dag. Arrangøren bak aksjonen var stifttinga Framtidshavet, som og arrangerer den tilsvarande aksjonen Rein Sognefjord.
Frå Fitjar vgs hadde elevane på vg3 påbygging og vg 2 helse og oppvekst studieførebuande, saman med tre engasjerte lærarar, valt seg ut Skumsnes i Fitjar som sitt ryddeområde. I strålande haust-solskin tok dei fatt på den store oppgåva, og nokre timar seinare var 13 fulle søppelsekkar levert i containeren på Nattrutekaien på Leirvik. Det vart rydda nokre kilo med søppel denne dagen, og alt elevane fann i sjøkanten på Skumsnes vart nøye notert ned i eit skjema som skal brukast til vidare arbeid i naturfagstimane.
Me er stolte av dei flotte, handlekraftige ungdomane våre som tek berekraftig utvikling i eigne hender!
